जामखेड। धनराज पवार
जामखेड शहरातील तपनेश्वर रोड येथील अगदी मुख्य रस्त्यावरील उघडी डीपी दुर्घटनेला निमंत्रण देत आहे. वारंवार तक्रार देऊनही कुणीच दखल घेत नसल्याने स्थानिक नागरिकांमध्ये रोष व्यक्त होत आहे.
#mscbjamkhed#mahalokwaninews#mahalokwanifollup pic.twitter.com/AbT4Jnqj4M
— Mahalokwani (@mahalokwani) June 18, 2023
डीपीची जागा बदलण्याची गरज नाही; मात्र सुरक्षित आणि योग्य उपाययोजना केली जावी, अशी स्थानिकांची मागणी आहे. आहुजा निवास समोरील ट्रान्सफार्मर (डिपी मुख्य मार्गावरच अगदी रस्त्यावर ही डीपी आहे. वरच्या भागात ट्रान्सफार्मर आणि यावरून मुख्य वीजवाहिनी आहे. मुख्य डीपी पुरती मोडकळीस आली आहे. पूर्वी ही यंत्रणा रस्त्याच्या कडेला होती. आता सिमेंट रस्ता तयार झाल्याने डीपी अगदी रस्त्यावर आली आहे. सुरक्षेची कोणतीच काळजी घेतली जात नाही. जनावरांचा नेहमीच वावर असतो. त्यांना कधीही धोका संभवू शकतो. वस्तीतील मंडळींना बाहेर पडण्यासाठी हाच मार्ग आहे.
बच्चे कंपनी रस्त्याच्या कडेला खेळत असते. तसेच फिरण्यासाठी घेऊन जाणाऱ्यांना याच डीपीपासून जावे लागते. एखादवेळी दुर्लक्ष झाल्यास मुले डीपीकडे जाण्याचा धोका असतो. लहान मुले नियमित येत असतात. पादचाऱ्यांनाही अगदी डीपीजवळून जावे लागते. यामुळे आवश्यक उपाययोजना करणे गरजेचे आहे. यासंदर्भात स्थानिक रहिवाशांनी संबंधित यंत्रणांकडे वारंवार तक्रारी केल्या. पण, कुणीही दाद देत नाही. जबाबदारी ढकलण्याचाच प्रयत्न केला जातो. या प्रकाराने नागरिक संतप्त असून प्रशासन दुर्घटनेची वाट बघत आहे काय?, असा प्रश्न नागरिकांनी उपस्थित केला.स्थानिक रहिवाशांकडून धोकादायक स्थितीबाबत वेळोवेळी तक्रारी करण्यात आल्या. पण, कुठूनच दाद मिळत नाही.
सुदैवाने अद्याप दुर्घटना घडली नसली तरी धोका कायम आहे. उलटपक्षी वीज यंत्रणा रस्त्यावर आल्यापासून धोका अधिकच वाढला आहे. दुर्घटना घडल्यास त्याला जबाबदार कोण?, एवढेतरी संबंधित यंत्रणेने स्पष्ट करावे.
गुलशन आहुजा (नागरिक) प्रतिक्रिया:
वरिष्ठ अधिकाऱ्यांनी लक्ष द्यावे. रहिवाशांनी या समस्या अनेकवेळा मांडल्या आहेत परंतु,महावितरणकडून उघड्या डीपी व लोंबकळणाऱ्या वायरची समस्या मार्गी लागत नसल्याने नाराजी व्यक्त होत आहे. महावितरण कंपनीच्या वरिष्ठ अधिकाऱ्यांनीच यात लक्ष यावे, जेणेकरून ही समस्या मार्गी लागेल, अशी अपेक्षा आहे.
