नगर – आपण जे काम करतो ते स्वत:ला फार अवघड वाटते व समोरचा जे काम करतो ते खूप सोपे आहे, असा दृष्टीकोन प्रत्येकाचा असतो. प्रत्येक कामात कष्ट आहे, वृत्तपत्र व्यवसायात कठोर परिश्रमाशिवाय पर्यायच नसतो. या व्यवसायामुळे कष्टाची किंमत समजते. तेव्हा तर आपण चिकाटीने बचत करतो. 15 वर्षांपूर्वी स्थापन केलेल्या बालाजी स्वयं सहाय्यता बचत गट एक खूप मोठा आधार आपल्याला आहे, असे प्रतिपादन ज्येष्ठ वृत्तपत्र विक्रेते विजय मते यांनी केले.
सावेडी उपनगरातील वृत्तपत्र विक्रेत्यांच्या श्री बालाजी स्वयं सहाय्यता बचत गटाची 15 वी वार्षिक सर्वसाधारण सभा संपन्न झाली. यावेळी 15 वर्षे यशस्वीपणे जबाबदारी पार पाडणारे अध्यक्ष संदिप लंके व सचिव पुरुषोत्तम दोमल यांचा विशेष सत्कार श्री.मते यांच्या हस्ते करण्यात आला. याप्रसंगी ऋषीकेश लखापती, प्रसाद लिमये, पुरुषोत्तम बेत्ती, विजय गव्हाणे, सुनिल सिद्दम, सुभाष संदीप गोफने काकडे, तुळशीराम जगधने, राहुल भालेराव, दत्तात्रय म्याना, सागर गाजेंगी, प्रशांत शिरापुरी, नितिन हंडोरे आदि उपस्थित होते.
श्री.मते पुढे बोेलतांना म्हणाले, वृत्तपत्र विक्रेत्यांनी आर्थिक गरज ओळखून स्थापना केली होती. या बचत गटामुळे विक्रेत्यांना बचत करण्याची सवय लागली. आई-वडिलांना घरातील सदस्यांना आजारपणासाठी, स्वत:चे घर घेण्यासाठी, मुला-मुलींच्या लग्नासाठी हक्काच्या कर्जाची सोय झाली. नियमित सर्व सदस्यांनी कर्ज वेळेत फेडले, त्यामुळे बचत गट प्रगती पथावर राहिला, असे सांगितले.
या सर्वसाधारण सभेत विविध विषयांवर खेळीमेळीच्या वातावरणात चर्चा झाली. ऐनवेळी आलेल्या महत्वाच्या विषयाला सर्वानुमते मान्यता देण्यात आली. सूत्रसंचालन राहुल भालेराव यांनी केले तर दत्तात्रय म्याना यांनी आभार मानले.
