आयपीएल (IPL- 2023) स्पर्धेच्या नवव्या सामन्यात कोलकाता नाइट रायडर्सने युवा गोलंदाज सुयश शर्माला संधी दिली. लांब केस असलेल्या तरुण गोलंदाज सुयश शर्माने पहिल्याच सामन्यात जबरदस्त कामगिरी केली. वेंकटेश अय्यरच्या जागी इम्पॅक्ट प्लेयर म्हणून त्याला संधी मिळाली
आयपीएल 2023 स्पर्धा आता रंगतदार वळणावर येत आहे. विजय आणि पराभवाची मालिका सुरु झाली असून गुणतालिकेचं गणित झपाट्याने बदलत आहे. नुसते गुण मिळवून फायदा नाही तर धावगतीकडे लक्ष देणं तितकंच महत्त्वाचं आहे. त्यामुळे सर्वच संघ यासाठी प्रयत्नशील असल्याचं दिसत आहे.
कोलकात्याने बंगळुरुवर 81 धावांनी विजय मिळवला. विराट कोहलीसह दिग्गज खेळाडू असूनही विजयी धावांचा पाठलाग करणं कठीण झाला. बंगळुरूचा संपूर्ण संघ 123 धावांवर बाद झाला. या सामन्यात सुयश शर्माने चमकदार कामगिरी केली.
आयपीएल 2023 स्पर्धेसाठी झालेल्या लिलावात केकेआरनं मिस्ट्री फिरकीपटू सुयश शर्माला 20 लाख रुपयात संघात घेतलं आहे. खरं तर सुयशनं यापूर्वी कधीच लिस्ट ए, फर्स्ट क्लास आणि टी 20 सामने खेळलेला नाही.सुयश शर्माला मिस्ट्री स्पिनर म्हणून बोललं जातं. सुयश लेग स्पिनर असून त्याची गुगली समजणं फलंदाजाला कठीण आहे. आरसीबी विरुद्धच्या पहिल्याच सामन्यात त्याने जबरदस्त कामगिरी केली.
