विधानसभेच्या 2019 च्या निवडणुकीनंतर मविआची स्थापना झाली त्यावेळी अनेक राजकीय घडामोडी घडलेल्या. त्यावेळी राजकीय खलबतांना कंटाळून अजित पवार यांनी थेट भाजपची हातमिळवणी केलेली आणि उपमुख्यमंत्री देवेंद्र फडणवीस यांच्यासोबत पहाटे मंत्रिपदाची शपथ घेतलेली. त्यानंतर ते सरकार फार काळ टिकलं नव्हतं. पण त्यावर स्पष्टीकरण देताना अजित पवार यांना रडू कोसळलं होतं. अजित पवार जितके कडक शिस्तीचे तितकेच ते संवेदनशील आणि हळवे देखील आहेत. त्यांचा हा संवेदनशील आणि हळवा स्वभाव अनेकदा बघायला मिळाला आहे. त्यामुळे अजित पवार यांचे अचानक दोन दिवसांचे कार्यक्रम रद्द झाल्याने राजकीय वर्तुळात विविध चर्चांना उधाण सुरु झालंय.
अजित पवार हे त्यांच्या रोखठोक स्वभावामुळे ओळखले जातात. ते कडक शिस्तीचे आहेत. त्यामुळे ते प्रशासनाला तोंडावर जाब विचारताना अनेकदा बघायला मिळाले आहेत. त्यांनी उपमुख्यमंत्री असताना अनेक अधिकाऱ्यांना धारेवरदेखील धरलंय. विशेष म्हणजे ते कॅमेऱ्यातदेखील कैद झालंय. त्यांच्या रोखठोक स्वभावाची प्रचिती संपूर्ण महाराष्ट्राला देखील आली आहे.
विशेष म्हणजे अजित पवार हे मांजरीमधील कार्यक्रमाला जात होते. पण कार्यक्रमाला जात असतानाच अचानक त्यांचा दौरा रद्द करण्यात आला. याशिवाय अजित पवार यांचे दोन दिवसांचे पुण्याचे कार्यक्रमदेखील स्थगित करण्यात आले आहेत. त्यामुळे अनेकांकडून आश्चर्य व्यक्त केलं जात आहे. याशिवाय राजकीय वर्तुळात विविध चर्चा सुरु झाल्या आहेत. या चर्चा वाढू नये यासाठी अजित पवार माध्यमांसमोर येऊन भूमिका मांडतात का? हे पाहणं महत्त्वाचं ठरणार आहे.
