अभिनेता रितेश देशमुख आणि महाराष्ट्राच्या लाडक्या वहिनी जेनिलिया देशमुख पहिल्यांदाचं एकत्र प्रेक्षकांच्या भेटीला येणार आहेत. 2012 मध्ये रितेश आणि जेनिलिया यांनी लग्न केलं. त्यानंतर जवळपास 10 वर्षांनी दोघेही पहिल्यांदा एकत्र मराठी सिनेमात दिसणार आहेत. रितेश आणि जेनिलिया यांच्या वेड या सिनेमाचा ट्रेलर नुकताच रिलीज झाला. हा सिनेमा येत्या 30 डिसेंबरला प्रेक्षकांच्या भेटीला येत आहे. दरम्यान आता हा सिनेमा ओरिजिनल नसून साऊथ सिनेमाचा रिमेक असल्याचं म्हटलं जात आहे. चला तर जाणून घेऊया नेमकं या चर्चांमागचं कारण काय ?
वेड टीझरनंतर सिनेमासाठी उत्सुकता चांगलीचं वाढली होती. दरम्यान प्रेक्षकांची उत्सुकता जास्त न ताणता सिनेमाचा ट्रेलर प्रेक्षकांच्या भेटीला आला. जेनिलिया, रितेशबरोबरच सिनेमात ज्येष्ठ अभिनेते अशोक सराफ, शुभंकर तावडे, साऊथ अभिनेत्री जिया शंकर प्रमुख भूमिकेत आहेत. दरम्यान अभिनेत्री जेनिलिया या सिनेमाची निर्माती आहे तर रितेश देशमुखनं सिनेमाचं दिग्दर्शन केलं आहे. दोघेही पहिल्यांदाच निर्माते आणि दिग्दर्शक म्हणून काम करत आहेत. त्याचप्रमाणे जेनिलिया देशमुख वेड सिनेमातून मराठी सिनेसृष्टीत आपलं पदार्पण करणार आहे. या ट्रेलरमधून जिनिलियाच्या मराठी संवादांनी तर चाहत्यांना भुरळ घातली आहे..
टीझर आणि ट्रेलरला पसंती मिळत असताना दुसरीकडे मात्र, रितेश आणि जेनिलियाचं हे वेड ओरिजनल नसल्याच्या चर्चा होत आहेत. वेड हा सिनेमा साऊथ सिनेमाचा मराठी रिमेक असल्याचं म्हटलं जात आहे. सिनेमाचा टीझर प्रदर्शित झाल्यापासूनच या चर्चा सुरू झाल्या आहेत. या चर्चांना कारण ठरलं आहे ते म्हणजे टीझर आणि ट्रेलरमधील काही सीन्स. जे सीन्स ‘मजिली’ या साऊथ सिनेमाशी तंतोतंत मिळते जुळते आहेत. दरम्यान त्या सीन्स बद्दल थोडक्यात सांगायचं झालं तर.. वेड सिनेमाच्या टीझरच्या शेवटी जेनिलिया छत्री घेऊन उभी आणि रितेश तिच्यासमोर सिगरेट पेटवताना दिसत आहे. हाच सीन मजिली सिनेमातही आहे.
तसंच दोन्ही सीन्समधील कलाकारांचे कॉस्ट्युम्सही सारखे आहेत. मजिली आणि वेड सिनेमातील हे दोन सारखे सीन्स एकत्र करून सोशल मीडियावर शेअर करण्यात आलेत. यावरून वेड हा मजिली या साऊथ सिनेमाचा मराठी रिमेक असल्याचं म्हटलं जात आहे. पण रितेश आणि जेनिलिया यांच्याकडून मात्र कोणतीही अधिकृत माहिती देण्यात आलेली नाही. दरम्यान चाहत्यांना ‘वेड’चा ट्रेलर विशेष आवडला आहे. महाराष्ट्राचे आवडीचे कपल या सिनेमात असल्याने, रिमेक असला तरी आम्ही हा सिनेमा पाहू असा प्रतिक्रिया सोशल मीडियावर उमटल्या आहेत.
