पुणे : सावित्रीबाई फुले पुणे विद्यापीठाच्या क्रीडा व शारीरिक शिक्षण मंडळाच्या वतीने योग विषयक प्रमाणपत्र अभ्यासक्रम शैक्षणिक वर्ष 2017-18 पासून सुरू करण्यात आलेला आहे. इयत्ता बारावी उत्तीर्ण किंवा समकक्ष असे कोणीही या अभ्यासक्रमासाठी प्रवेश घेऊ शकत असून या प्रमाणपत्र अभ्यासक्रमाचा कालावधी तीन महिन्यांचा आहे. दिनांक 2 जानेवारी 2023 पासून याचे प्रवेश अर्ज सुरू होत असून दिनांक 14 जानेवारी 2023 पर्यंत यासाठी अर्ज करता येणार आहे, अशी माहिती क्रीडा व शारीरिक शिक्षण मंडळाचे संचालक डॉ.दीपक माने यांनी दिली आहे.
नवे वर्ष नवे नियम; बँक लॉकर, क्रेडिट कार्डपासून ‘या’ नियमांमध्ये होणार मोठा बदल !
किती जागा आहेत उपलब्ध?
यासाठी 50 जागा असून प्रथम प्रवेश घेणाऱ्या व्यक्तीस प्रथम प्राधान्य यानुसार प्रवेश देण्यात येणार आहे. यासाठी भारतीय तसेच परदेशी विद्यार्थी देखील ऑनलाईन पद्धतीने अर्ज करू शकतात. या अभ्यासक्रमाची वेळ दररोज दुपारी 3 ते 6 आहे. विद्यार्थ्यांना सावित्रीबाई फुले पुणे विद्यापीठाच्या http://www.unipune.ac.in/ या संकेतस्थळावर जाऊन अर्ज करता येणार आहे. सदर अभ्यासक्रमात पारंपारिक योग व निरोगीपणा योग पद्धती शरीरविज्ञान आणि योग विज्ञान अध्यापन पद्धती या विषयांचे अध्यापन केले जाणार आहे व विविध योग आसने शिकवले जाणार आहेत.
200 गुणांची लेखी व 100 गुणांची प्रात्यक्षिक अशी एकूण 300 गुणांची 12 क्रेडिटची अंतिम श्रेयांक परीक्षा घेतली जाते. सदर अभ्यासक्रम पूर्ण झाल्यावर विद्यार्थ्यांना योगाच्या अनेक नोकरीच्या संधी उपलब्ध आहेत. तसेच योगामध्ये पुढील शिक्षणासाठी सदर अभ्यासक्रम पूर्ण केलेल्या विद्यार्थ्यांना विद्यापीठात एम.ए. योगा या दोन वर्षांच्या अभ्यासक्रमात सुद्धा प्रवेश घेता येईल.
योग विषयक प्रमाणपत्र अभ्यासक्रमाला प्रतिसाद
उत्तम आरोग्याविषयी तरुणांमध्ये जागरूकता निर्माण होने ही सकारात्मक बाब आहे. याचाच परिणाम म्हणून विद्यापीठाच्या योग विषयक प्रमाणपत्र अभ्यासक्रमाला प्रतिसाद वाढत आहे. या अभ्यासक्रमाच्या शिक्षणामुळे आरोग्याविषयी जनजागृती निर्माण होण्यास मदत होत असल्याचेही डॉ. दिपक माने यांनी सांगितले.
