जामखेड तालुक्यातील मौजे वाकी येथे पेजल योजनेअंतर्गत नळ पाणीपुरवठा कामात अपहार झाल्या प्रकरणी जामखेड पंचायत समिती कार्यालय समोर 3 जानेवारी 2023 रोजी उपोषणास बसण्याचा इशारा रिपब्लिकन पार्टी ऑफ इंडियाचे जिल्हाध्यक्ष सुनील साळवे यांनी दिला आहे. त्यांनी वाकी येथील नळ पाणीपुरवठा योजनेच्या निकृष्ट कामाची चौकशी होणे संदर्भात जिल्हाधिकारी कार्यालय , मुख्य कार्यकारी अधिकारी जिल्हा परिषद अहमदनगर, गटविकास अधिकारी पंचायत समिती जामखेड ,तहसीलदार जामखेड ,यांना निवेदन दिले होते. परंतु ,पंचायत समितीचे गटविकास अधिकारी यांनी या तक्रारीची दखल न घेतल्यामुळे मंगळवार दिनांक 3 जानेवारी रोजी सकाळी ११.३० वाजता ते कार्यकर्त्यांसह उपोषणास बसणार आहेत.
त्यांनी दिलेल्या निवेदनात म्हटले आहे की., वाकी गावातील दलित वस्तीसह चार वस्त्या साठी पाणीपुरवठा करण्यासाठी अद्याप पर्यंत पाईपलाईन टाकलेली नाही. या योजनेतील विहीर तलावामध्ये खोदली असल्याने या तलावात आठ महिने विहीर पाण्याखाली जाणार असल्याने नागरिकांना दूषित पाणी प्यावे लागणार आहे.
तसेच या विहिरीची खोली बारा मीटर करणे अपेक्षित होते., परंतु इस्टिमेटप्रमाणे काम झालेले दिसत नाही. त्यामुळे अधिकारी व ठेकेदार यांनी संगणमतानं अपहार केल्याचे त्यांनी तक्रारीत म्हटले आहे. बोगस एम बी रेकॉर्ड करणाऱ्या अधिकारी व ठेकेदारावर उच्चस्तरीय चौकशी करून निलंबनाची कार्यवाही करावी अशी मागणीही जिल्हाध्यक्ष सुनील साळवे यांनी केली आहे.
