पिंपरी : भारतीय जनता पक्षाचे आमदार लक्ष्मण जगताप यांचे दीर्घ आजारामुळे निधन झाले. पुण्यातील खासगी रुग्णालयात उपचार सुरु असताना आज मंगळवारी सकाळी त्यांनी अखेरचा श्वास घेतला. पुण्यातील चिंचवड विधानसभा मतदारसंघाचे भाजप आमदार लक्ष्मण जगताप हे अनेक दिवसांपासून कर्करोगाशी झुंज देत होते. ते ५९ वर्षांचे होते.
लक्ष्मण जगताप यांची प्रकृती गेल्या काही दिवसांपासून साथ देत नव्हती. अश्यातच पुन्हा त्यांची तब्येत खालावली होती. त्यांच्यावर खासगी रुग्णालयात उपचार सुरू होते. मात्र या दरम्यान त्यांचे निधन झाल्याचे त्यांच्या निकटवर्तीयांनी सांगितले आहे. जगताप यांच्या निधनामुळे पिंपरी चिंचवड शहरात तसेच चिंचवड मतदार संघात शोककळा पसरली आहे.
पुण्यातील कसबा पेठ मतदारसंघातील भाजप आमदार मुक्ता टिळक यांच्या निधनातून पक्ष सावरत असतानाच त्यांना आणखी एक धक्का बसला आहे.
गेल्या काही महिन्यांपासून लक्ष्मण जगताप हे कर्करोगाशी झुंज देत होते. त्यामुळे ते अंथरुणला खिळून होते. परिणामी लक्ष्मण जगताप हे राजकीय जीवनात सक्रिय नव्हते. तरीही महाराष्ट्राच्या सत्तांतरापूर्वी झालेल्या राज्यसभा आणि विधानपरिषद निवडणुकीवेळी लक्ष्मण जगताप हे पुण्यातून रुग्णावाहिकेतून मुंबईला गेले होते. त्यानंतर जगताप यांना मतदानासाठी व्हिलचेअरवरुन आत नेण्यात आले होते. त्यांनी दाखवलेल्या या इच्छाशक्तीचे अनेकांनी कौतुक केले होते.
लक्ष्मण जगताप यांची राजकीय कारकीर्द
लक्ष्मणराव जगताप यांनी काँग्रेस पक्षातून राजकीय क्षेत्रात पदार्पण केले होते. १९९२ च्या निवडणुकीत ते नगरसेवकपदी निवडून आले.१९९७ च्या निवडणुकीतही ते निवडून आले. सलग दहा वर्षे त्यांनी पिंपळे गुरवचे प्रतिनिधित्व केले. १९९३-९४मध्ये ते महापालिकेच्या स्थायी समितीचे सभापती होते. १९९८ मध्ये अस्तित्वात आलेल्या राष्ट्रवादी काँग्रेसमध्ये त्यांनी प्रवेश केला.
राष्ट्रवादीचे अध्यक्ष शरद पवार यांचे निष्ठावान कार्यकर्ता अशी त्यांची ओळख होती. १९ डिसेंबर २००० ते १३ मार्च २००२ या कालावधीत त्यांनी पिंपरी-चिंचवडचे महापौरपद भूषवले. मात्र, २००३-०४ मध्ये झालेल्या विधान परिषदेच्या निवडणुकीसाठी स्थानिक स्वराज्य संस्था गटातून त्यांनी पक्षाकडे उमेदवारी मागितली. त्यांना उमेदवारी नाकारण्यात आली. त्यामुळे त्यांनी बंडखोरी केली.
विधान परिषदेची निवडणूक अपक्ष लढवून विजय मिळवला होता. २०१४ च्या लोकसभा निवडणुकीत राष्ट्रवादी काँग्रेसने उमेदवारी नाकारल्याने लक्ष्मणराव जगताप यांनी शेकापमध्ये प्रवेश केला होता. पण या निवडणुकीत त्यांचा पराभव झाला. त्यानंतर काही महिन्यांतच झालेल्या विधानसभा निवडणुकीत ते भाजपकडून उभे राहिले होते. या निवडणुकीत लक्ष्मण जगताप विजयी होऊन विधानसभेत निवडून गेले होते.
