सोलापूर : पंढरपूर तालुक्यातील कासेगाव येथे चक्क मुलाने आपल्या जन्मदात्या पिताला पेटवून मारून टाकले असल्याची घटना घडली आहे. हे हत्या प्रकरण एका प्रेम प्रकरणातून घडले. यामध्ये मयत अफजल बागवान यांचा मुलगा सोहेल यासह तीन अल्पवयीन मुलांना पोलिसांनी ताब्यात घेतले असल्याची माहिती पोलीस निरीक्षक मिलिंद पाटील यानी दिली. तीन अल्पवयीन मुलांच्या आईचे अफजल बागवान यांच्याशी प्रेमसंबंध होते. तर तीन अल्पवयीन मधील एका मुलीचे अफजल बागवान यांचा मुलगा सोहेल याच्याशी प्रेमसंबंध होते. मात्र अफजलला सोहेलचे आणि संबंधित अल्पवयीन मुलीचे प्रेमसंबंध अमान्य होते.
यातूनच प्रेयसीने आपला प्रियकर असणाऱ्या सोहेलच्या मदतीने त्याच्याच पित्याचा अर्थात अफजलचा काटा काढण्याचे ठरवले. यातूनच पंढरपूर तालुक्यातील कासेगाव येथे अफजल बागवान यास घेऊन जात डोळ्यात लाल तिखट टाकले. डोक्यावर दगड मारून पेट्रोल टाकून त्यांना पेटवून देण्यात आले.
यामध्येच अफजल बागवान यांचा मृत्यू झाला आहे. या घटनेने पंढरपूर तालुक्यात एकच खळबळ उडाली. प्रेमासाठी चक्क मुलाने आपल्या बापानेच संपवले आहे. याबाबत पंढरपूर तालुका पोलीस अधिकचा तपास करीत आहेत. अशी माहिती तालुका पोलीस स्टेशनचे पोलीस निरीक्षक मिलिंद पाटील यांनी दिली.
प्रेमासाठी वाट्टेल ते असं म्हणतात. पण, प्रेयसीसाठी बापाला संपविणारे विरळेच. प्रेमात काही लोकं आंधळे होतात, असं म्हणतात. त्यातलाच हा प्रकार दिसून येतो. या घटनेनं पंढरपूर तालुक्यात खळबळ उडाली आहे.
